Povu Ki’ik Sofre Tanba Fahi Mate Maibe Ministério da Agricultura e Pescas Soe Estraga Vasina.

Ministério da Agricultura e Pescas deklara katak Timor-Leste infetadu ona ho moras African Swine Fever (ASF). Liu husi amostra ran fahi nian nebé haruka ba laboratóriu iha Australia, no rezultadu hatudu katak husi fahi hotu nebé mate iha 41% maka infetadu husi moras African Swine Fever. Ho ida ne’e ita bele foti konkluzaun katak 59% fahi mate tanba moras seluk nebé hanaran Classical Swine Fever (CSF).

Tuir informasaun nebé hetan husi fontes lubuk ida hateten katak moras CSF antes ne’e tama ona iha Timor-Leste iha tinan 1997, no wainhira Timor-Leste restaura ninia independénsia iha tinan 2002, hahú kedan iha mandatu Primeiro Governo Constituçional deklara katak kona-bá assuntu sosa vasina tenke hala’o husi Governo liu husi Ministério da Agricultura e Pescas atu nune’e fasil atu kontrola movimentasaun no utilizasaun husi vasina hirak ne’e.

Ministério da Agricultura e Pescas gasta ona osan lubuk ida husi Orsamento Geral do Estado (OGE) hodi sosa vasina lubuk id aba moras CSF maibe la halo ezekusaun ho didiak ba vasina sira nebé sosa ona tanba fahi nebé mate iha Timor-Leste hahú husi Dili no da’et ba munisípiu hotu no to’o ohin loron povu hasoru susar oi-oin hanesan moris Kultural no Sosio-ekonómiku.

Hahalok ida hanesan ne’e ita bele nota katak pessoal sira nebé lidera Ministerio no Departamento relevante laiha kapasidade jestaun nebé diak hodi jere osan povu nian.

Imajen husi vasina sira nebé prazu liu ona ne’e hetan iha loron Segunda Feira, 15 Novembro 2021.

Iha tempu badak ekipa Média Laloran Tasi Mane sei tenta atu intervista Diretora Nacional da Veterinaria kona-bá assuntu ne’e.

Média Laloran Tasi Mane

16 Novembru 2021